ഫൈസർ-ബയോൺടെക് വാക്സിൻ സ്വീകരിച്ച ഡോക്ടറെ ആശുപത്രിയിൽ പ്രവേശിപ്പിച്ചു. പാർശ്വഫലങ്ങളുണ്ടായതിനെ തുടർന്നാണിത്. കോവിഡ് വാക്സിൻ സ്വീകരിച്ച വനിതാഡോക്ടറെയാണ് സന്നിയും ശ്വാസതടസവും ത്വക്കിൽ തിണർപ്പും ചൊറിച്ചിലും അനുഭവപ്പെട്ടതിനെ തുടർന്ന് തീവ്രപരിചരണവിഭാഗത്തിൽ പ്രവേശിപ്പിച്ചത്. പാർശ്വഫലങ്ങളെ കുറിച്ച് പഠനം നടക്കുന്നതായി മെക്സിക്കൻ അധികൃതർ അറിയിച്ചു.

തലച്ചോറിലും നട്ടെല്ലിലും അണുബാധയുണ്ടാകുന്ന എൻസെഫലോമയോലൈറ്റിസ് ആണ് ഡോക്ടർക്ക് എന്നാണ് വിദഗ്ധരുടെ പ്രാഥമികനിഗമനമെന്ന് ആരോഗ്യ മന്ത്രാലയം പുറത്തിറക്കിയ വാർത്താക്കുറിപ്പിൽ വ്യക്തമാക്കി. ഡോക്ടർക്ക് അലർജിയുള്ളതായും വാക്സിൻ സ്വീകരിച്ച മറ്റാർക്കും പാർശ്വഫലങ്ങളൊന്നുമുണ്ടായില്ലെന്നും ആരോഗ്യവകുപ്പ് പറഞ്ഞു.