കൊറോണ വൈറസ് ബാധിധിതരിൽ തലച്ചോറിന് ദീർഘകാല ആഘാതമുണ്ടാക്കാമെന്നും ചിലരിൽ തലച്ചോറിന് 10 വർഷം വരെ പ്രായമേറിയത് പോലെ അനുഭവപ്പെടാമെന്നുമാണ് പഠനം. കോവിഡ് തലച്ചോറിന്റെ ധാരണാ ശക്തിയെ കാര്യമായ തോതിൽ ബാധിക്കുമെന്നാണ് ലണ്ടനിലെ ഇംപീരിയൽ കോളജിലെ ഡോ. ആദം ഹാംപ്ഷയർ നടത്തിയ പഠനത്തിലെ കണ്ടെത്തൽ. 84,000ലധികം പേരെ അടിസ്ഥാനമാക്കി നടത്തിയ പഠനം അനുസരിച്ച്‌ കോവിഡ് രോഗമുക്തി നേടിയവർ ലക്ഷണങ്ങളെ അതിജീവിച്ച്‌ കഴിഞ്ഞും തലച്ചോറിന്റെ ഗ്രഹണ ശേഷി സംബന്ധമായ പ്രശ്നങ്ങൾ പ്രകടിപ്പിക്കാം.

ഗ്രേറ്റ് ബ്രിട്ടീഷ് ഇന്റലിജെൻസ് ടെസ്റ്റ് എന്നായിരുന്നു ഈ പരീക്ഷണത്തിന്റെ പേര്. വാക്കുകൾ ഓർത്തിരിക്കാനും പസിലുകൾ ചെയ്യാനുമൊക്കെയുള്ള തലച്ചോറിന്റെ കഴിവിനെയാണ് കോഗ്‌നിറ്റീവ് ടെസ്റ്റുകളിലൂടെ അളക്കുന്നത്. അൽസ്‌ഹൈമേഴ്സ് പോലുള്ള രോഗങ്ങൾ ബാധിച്ചവരുടെ തലച്ചോറിന്റെ ശേഷി അളക്കാൻ ഇത്തരം ടെസ്റ്റുകൾ വ്യാപകമായി ഉപയോഗിക്കാറുണ്ട്. ഇത്തരത്തിലൊരു പരീക്ഷയാണ് 84,285 പേരെ കൊണ്ട് ഹാംപ്ഷയറും സംഘവും ചെയ്യിച്ചത്. ഇതിലൂടെ ചിലരുടെ തലച്ചോറിന് 10 വർഷമെങ്കിലും പ്രായമേറിയത് പോലെ കണ്ടെത്തുകയായിരുന്നു.