ഉപതെരഞ്ഞെടുപ്പ് നടക്കാനിരിക്കുന്ന കുട്ടനാട് സീറ്റ് കോൺഗ്രസിന് വിട്ടുനൽകുന്നതിനുള്ള ഉപാധി മുന്നോട്ട് വെച്ച് കേരള കോൺഗ്രസ് ജോസഫ് വിഭാഗം. അടുത്ത നിയമസഭാ തിരഞ്ഞെടുപ്പില്‍ പകരം മൂവാറ്റുപുഴ സീറ്റ് വിട്ട് കിട്ടണമെന്നാണ് ഉപാധിയിൽ പറയുന്നത്. അതേസമയം കുട്ടനാട് സീറ്റ് വിട്ടുനല്‍കില്ലെന്ന് ജോസ് കെ.മാണി വിഭാഗം ആവര്‍ത്തിച്ച് പറയുന്ന സാഹചര്യത്തിലാണ്  ജോസഫ് വിഭാഗത്തിൻറെ ഈ നീക്കം.  കഴിഞ്ഞ തവണ കുട്ടനാട്ടില്‍ തോമസ് ചാണ്ടിയോട് മത്സരിച്ചത് ജോസഫിനൊപ്പമുള്ള ജേക്കബ് എബ്രഹാമാണ്. ഇത്തവണയും ജേക്കബ് എബ്രഹാമിനെ സ്ഥാനാർഥിയാക്കാനാണ് ജോസഫ് ഗ്രൂപ്പിൻറെ തീരുമാനം. അതിനിടെ,  ഏതെങ്കിലും ഘട്ടത്തിൽ കോൺഗ്രസിന് സീറ്റ് വിട്ടുകൊടുക്കേണ്ടി വന്നാൽ മാത്രമാണ് പകരമായി മൂവാറ്റുപുഴ എന്ന ഉപാധി മുന്നോട്ട് വെച്ചത് എന്നാണ് ജോസഫ് വിഭാഗം വ്യക്തമാക്കിയിട്ടുള്ളത്.