കൊറോണ വൈറസ് ഭീതിയിൽ പ്രതിസന്ധിയിലായി കെ എസ് ആർ ടി സി. സംസ്ഥാനത്ത് രോഗവ്യാപനം തടയുന്നതിനുവേണ്ടി കർശന നിർദേശങ്ങളാണ് അധികൃതർ പുറപ്പെടുവിച്ചിട്ടുള്ളത്. കൊറോണ ഭീതി മൂലം യാത്രക്കാരുടെ എണ്ണത്തിലും വരുമാനത്തിലും വലിയ കുറവാണ് ഉണ്ടായിരിക്കുന്നത്. പ്രതിദിനം ശരാശരി ഒന്നര കോടിയോളം രൂപയുടെ കുറവ് വരുമാനത്തിലുണ്ടായെന്നും കോർപറേഷൻ കടുത്ത പ്രതിസന്ധിയിലേക്കാണ് പോകുന്നതെന്നും ഗതാഗത വകുപ്പ് മന്ത്രി എകെ ശശീന്ദ്രൻ പറഞ്ഞു. 

ഈ മാസം പൊതുപരിപാടികളും, കൂട്ടംകൂടി ഇടപഴകുന്നതും ഒഴിവാക്കണമെന്ന് സംസ്ഥാന സർക്കാറിന്റെ കർശന നിർദേശമുണ്ട്. അതേസമയം രാജ്യത്ത് കോവിഡ് 19 രോഗം സ്ഥിരീകരിച്ചവരുടെ എണ്ണം 110 ആയി. 14 സംസ്ഥാനങ്ങളിലായി 110 പേർക്കാണ് രോഗം സ്ഥിരീകരിച്ചിട്ടുള്ളത്. ഇന്നലെ മാത്രം രോഗം സ്ഥിരീകരിച്ചത് 25 പേർക്കാണ്.