മുൻപുണ്ടായിട്ടില്ലാത്ത വിധത്തിലുള്ള അടിയന്തിര സാഹചര്യങ്ങൾ വരുമ്പോൾ അടിയന്തിര തീരുമാനങ്ങളെടുക്കണമെന്ന് വിശദീകരിച്ച് ട്വിറ്റർ തങ്ങളുടെ സ്ഥാപനത്തിലെ 4900 ജീവനക്കാരോട് നിശ്ചിത കാലയളവ് വീട്ടിലിരുന്ന് ജോലി ചെയ്താൽ മതിയെന്ന് അറിയിച്ചു. ജീവനക്കാർ നിർബന്ധമായും വീട്ടിലിരുന്ന് ജോലി ചെയ്യണമെന്നാണ് അറിയിപ്പ്. ബുധനാഴ്ച വൈകുന്നേരത്തോടെയാണ് പ്രമുഖ സമൂഹ മാധ്യമ സ്ഥാപനം ഈ സുപ്രധാന തീരുമാനമെടുത്തത്. 
കരാർ അടിസ്ഥാനത്തിലും മണിക്കൂർ നിരക്കിലുള്ള വേതനവ്യവസ്ഥകളിലും ജോലി ചെയ്യുന്നവർക്കും കൃത്യമായി ശമ്പളമെത്തിക്കുമെന്നും കമ്പനി അറിയിച്ചു. ലോകാരോഗ്യസംഘടന കോവിഡ് 19 ബാധയെ മഹാമാരിയായി പ്രഖ്യാപിച്ചതാണ് സ്ഥാപനം ഇത്തരമൊരു തീരുമാനമെടുക്കാൻ കാരണം. ആഗോളതലത്തിൽ കൊറോണ ബാധമൂലം മരിച്ചവരുടെ എണ്ണം 4000 കടന്നിട്ടുണ്ട്.