ആഗോളതലത്തിൽ കൊവിഡ് 19 പടർന്നുപിടിക്കുന്ന സാഹചര്യത്തിൽ ഡോളറിനെതിരെയുള്ള രൂപയുടെ മൂല്യത്തില്‍ കനത്ത ഇടിവ്. യൂറോപ്പില്‍ നിന്നുള്ള യാത്രയ്ക്ക് യുഎസ് താല്‍ക്കാലിക വിലക്ക് ഏര്‍പ്പെടുത്തിയതോടെ രൂപയുടെ മൂല്യം 82 പൈസ കുറഞ്ഞ് ഡോളറിനെതിരെ 74.50 ല്‍ എത്തി. ഇതോടെ 2018 ഒക്ടോബറിലെ നിലവാരമായ 74.48 രൂപയ്ക്കടുത്തായി. വിദേശ നിക്ഷേപകര്‍ കൂട്ടത്തോടെ രാജ്യത്തെ ഓഹരികളും കറന്‍സികളും ഉപേക്ഷിച്ചതാണ് രൂപയുടെ ഇടിവിന് കാരണം. അതിനിടെ, ആഭ്യന്തര ഓഹരി വിപണി 30 മാസത്തെ ഏറ്റവും താഴ്ന്ന നിലയിലേക്ക് നീങ്ങി. ബെഞ്ച്മാര്‍ക്ക് സൂചികയായ നിഫ്റ്റി 50 ആഗോള വിപണികളില്‍ 10,000 മാര്‍ക്കിന് താഴെയായി. കൊറോണ വൈറസിനെ തുടര്‍ന്ന് സാമ്പത്തിക മാന്ദ്യം വര്‍ദ്ധിക്കുമെന്ന ആശങ്കകള്‍ക്കിടയിലാണ് വിപണിയിലെ പങ്കാളിത്തം കുറഞ്ഞതെന്നു ഫോറെക്സ് വ്യാപാരികള്‍ പറയുന്നു. അതേസമയം ഇന്ന് വൈകീട്ട് പുറത്തുവരാനിരിക്കുന്ന റീട്ടെയില്‍ പണപ്പെരുപ്പം, ഫാക്ടറി ഡാറ്റ തുടങ്ങിയവ കാത്തിരിക്കുകയാണ് നിക്ഷേപകര്‍.