നോട്ട് നിരോധന പ്രഖ്യാപനത്തിന് നാളെ മൂന്നു വർഷം തികയാനിരിക്കേ ബാങ്ക് നിക്ഷേപങ്ങളിൽ കുറവുണ്ടായതായും  ആളുകൾ കൈവശം  സൂക്ഷിക്കുന്ന കറൻസി കൂടിയതായും സർക്കാർ ഡേറ്റ. സ്റ്റാറ്റിക്സ് മന്ത്രാലയത്തിന്റെ ദേശീയ അക്കൗണ്ട്സ് സ്റ്റാറ്റിക്സാണ് ഈ വിവരങ്ങൾ നൽകിയത്. നോട്ടുനിരോധനത്തിേന് ശേഷം ജനങ്ങൾ ബാങ്കിൽ നിന്ന് പണം പിൻവലിച്ച് കൈവശം സൂക്ഷിക്കാൻ തുടങ്ങിയതായാണ് കണക്കുകൾ സൂചിപ്പിക്കുന്നത്. വിപണിയിൽ പണമിറക്കാനുള്ള മടി സാമ്പത്തികമാന്ദ്യത്തിന് ആക്കം കൂട്ടുന്നതായും സൂചനയുണ്ട്.

ബാങ്കിനിക്ഷേപങ്ങൾ 2016-17 ൽ ആകെ സമ്പാദ്യത്തിന്റെ 63.3 ശതമാനം ആയിരുന്നത് 2017-18 ൽ 28.6 ശതമാനമായി കുറഞ്ഞു. കൈവശം വയ്ക്കുന്ന കറൻസി 2016-17 കാലത്ത് 22 ശതമാനമായിരുന്നത് 2017-18 കാലത്ത് 25.2 ശതമാനമായി.
വിപണിയിൽ കറൻസി എത്തിത്തുടങ്ങിയപ്പോൾ ജനങ്ങൾ ബാങ്ക് നിക്ഷേപങ്ങൾ‌‍ പിൻവലിച്ച് കൈവശം പണം സൂക്ഷിക്കാൻ തുടങ്ങിയതാണ് ഇപ്പോഴും തുടരുന്ന ട്രൻഡ്. 

2011-12 കാലത്ത് ആകെ പ്രചാരത്തിലുണ്ടായിരുന്ന കറൻസിയുടെ 10.08 മാത്രമാണ് ജനങ്ങളുടെ കൈവശമുണ്ടായിരുന്നത്. നോട്ടുനിരോധനകാലത്ത് ഇത് 24.25 ശതമാനമായിരുന്നു. അതിനു തൊട്ടുമുമ്പിലത്തെ വർഷം 12.22 ശതമാനമായിരുന്നു. നോട്ടുകൾ വിപണിയിലെത്തിയ  2017-18 ൽ ആകെ പ്രചാരത്തിലുള്ള കറൻസിയുടെ 26.10 ശതമാനം ജനങ്ങളുടെ കയ്യിലായി.