ചൈനയിൽ സർക്കാർ ഉടമസ്ഥതയിലുള്ള മൂന്ന് വയർലസ് കമ്പനികൾ 5 ജി സേവനം ആരംഭിച്ചു. അടുത്തവർഷത്തോടെ യു.എസിനെയും മറ്റ് പാശ്ചാത്യരാജ്യങ്ങളെയും പിന്തള്ളി ഈ രം​ഗത്ത് മുന്നിലെത്താനാണ് ചൈനയുടെ ശ്രമം. ചൈന മൊബീൽ ലിമിറ്റഡ്, ചൈന ടെലകോം കോർപ്, ചൈന യൂനികോ ഹോങ്കോങ്ങ് ലിമിറ്റഡ് എന്നീ കമ്പനികളിലാണ് 5 ജി സേവനം തുടങ്ങിയത്. ചൈന മൊബീൽ ലിമിറ്റഡ് തലസ്ഥാന ന​ഗരമായ ബെയ്ജിങ്ങ്, ഷാങ്ഹായ്, ഷെൻഷെൻ എന്നിവയുൾപ്പെടെ 50 ന​ഗരങ്ങളിൽ സേവനം തുടങ്ങി. പ്രതിമാസം ഏകദേശം 18 ഡോളർ എന്ന നിരക്കിലാണ് 5 ജി പാക്കേജിന് ഈടാക്കുന്നത്. 5 ജി സാങ്കേതികവിദ്യ വികസിപ്പിക്കുന്നതിൽ നിന്ന് വിവിധ ചൈനീസ് കമ്പനികൾക്ക് ഉപരോധ നീക്കങ്ങൾ ആരംഭിച്ച യു. എസിന് ഇത് തിരിച്ചടിയായി മാറി.

യു.എസുമായുള്ള വ്യാപാരയുദ്ധത്തിൽ തിരിച്ചടി നേരിട്ട അവസരത്തിലാണ് 5 ജി സേവനം വേ​ഗത്തിലാക്കാൻ ചൈന തീരുമാനിച്ചത്. അടുത്ത വർഷത്തോടെ 17 കോടി ഉപഭോക്താക്കളുമായി ഈ രം​ഗത്ത് മുന്നിലെത്താമെന്നാണ് ചൈന കണക്കുകൂട്ടുന്നത്.