കേരളത്തിൽ മിനിമം ബസ് ചാർജ് പത്തുരൂപയാക്കാൻ ആലോചന. ഇന്നലെ ഗതാഗത മന്ത്രി ആൻറണി രാജുവിൻറെ അധ്യക്ഷതയിൽ പ്രൈവറ്റ് ബസ് ഉടമകളുമായി കോട്ടയത്ത് നടത്തിയ യോഗത്തിൽ ഇത് സംബന്ധിച്ച് ഏകദേശ ധാരണയായെന്നാണ് വിവരം. അതേസമയം വിദ്യാർഥികളുടെ യാത്ര നിരക്കിൽ ഉടൻ വർധനവ് ഉണ്ടായേക്കില്ല. ഇക്കാര്യത്തിൽ വിശദമായ കൂടിയാലോചനകൾക്ക് ശേഷമാകും തീരുമാനം.വിദ്യാർഥികളുടെ ഉൾപ്പടെ യാത്രാ നിരക്ക് വർധിപ്പിക്കണമെന്നും ഡീസൽ സബ്‌സിഡി അനുവധിക്കണമെന്നുമാണ് ബസ് ഉടമകളുടെ പ്രധാന ആവശ്യം. നിലവിലെ കിലോമീറ്റർ നിരക്ക് 90 പൈസയിൽ നിന്ന് ഒരു രൂപയാക്കി വർധിപ്പിക്കുക, കൊവിഡ് അവസാനിക്കുന്നത് വരെ ബസുകളുടെ വാഹന നികുതി പൂർണമായും ഒഴിവാക്കുക എന്നീ ആവശ്യങ്ങളാണ് ബസ് ഉടമകൾ മന്ത്രിതല ചർച്ചയിൽ മുന്നോട്ട് വച്ചിരുന്നത്.