ദുബായില്‍ ജൈടെക്‌സ് സാങ്കേതികവിദ്യാ പ്രദര്‍ശനത്തില്‍ ലോകശ്രദ്ധയാകര്‍ഷിച്ച് കേരളത്തില്‍ നിന്നുള്ള സ്റ്റാര്‍ട്ട് അപ് സംരംഭങ്ങള്‍. സംസ്ഥാനത്തു നിന്നുള്ള പതിനെട്ട് സ്റ്റാര്‍ട്ട് അപ് സംരംഭങ്ങളാണ് നവീന സാങ്കേതികവിദ്യകള്‍ പരീക്ഷിക്കപ്പെടുന്ന ഉത്പന്നങ്ങളുമായി ആഗോളതലത്തില്‍ ശ്രദ്ധ നേടിയത്.

ഗള്‍ഫ് വിപണിയലേക്ക് പ്രവേശിക്കാനുള്ള താല്പര്യവുമായെത്തിയ സ്റ്റാര്‍ട്ട് അപ്പുകള്‍ക്ക് അതിനുള്ള മികച്ച അവസരമാണ് ലഭിച്ചത്. ഇതാദ്യമായാണ് കേരളത്തിലെ സ്റ്റാര്‍ട്ട് അപ്പുകള്‍  ഇത്രയും ശക്തവും വൈവിധ്യമേറിയതുമായ സാന്നിധ്യം ജൈടെക്‌സില്‍ തെളിയിച്ചത്.

ബ്ലോക്‌ചെയിന്‍, ആര്‍ട്ടിഫിഷ്യല്‍ ഇന്റലിജന്‍സ്, വിര്‍ച്വല്‍ റിയാലിറ്റി, റോബോട്ടിക്‌സ് തുടങ്ങിയ വിപ്ലവകരമായ സാങ്കേതിക വിദ്യകളിലായിരുന്നു കേരളത്തില്‍ നിന്നുള്ള സ്റ്റാര്‍ട്ട് അപ്പുകളുടെ പരീക്ഷണങ്ങള്‍ അധികവും.  ജൈടെക്‌സിലെ ഫ്യൂച്ചര്‍ സ്റ്റാര്‍സ് വേദിയിലും ഇന്ത്യയില്‍ നിന്ന് മറ്റൊരു സംസ്ഥാനത്തിനും എണ്ണത്തിലും സാങ്കേതികവിദ്യയുടെ വൈവിധ്യത്തിലും കേരളത്തിലെ സംരംഭങ്ങളോട് മത്സരിക്കാനായില്ല. കേരള സ്റ്റാര്‍ട്ട് അപ് മിഷന്റെ നേതൃത്വത്തിലായിരുന്നു ലോക വിപണി തേടി പുതു സംരംഭകരുടെ അന്വേഷണം.