കൊച്ചി: രാജ്യത്തെ ഏറ്റവും വലിയ പൊതുമേഖലാ ബാങ്കായ എസ്.ബി.ഐയുടെ സേവന നിരക്കുകള്‍ പരിഷ്കരിച്ചത് ഇന്നു മുതല്‍ പ്രാബല്ല്യത്തില്‍ വരും. ഏടിഎം ഉപയോഗിച്ചു പണം പിന്‍വലിക്കുന്നതിനു മുതല്‍ മിനിമം ബാലന്‍സ് നില നിര്‍ത്താത്തതിനു പിഴ ഈടാക്കുന്നതില്‍ വരെ മാറ്റങ്ങള്‍ വരുത്തിയിട്ടുണ്ട്. 

ബാങ്ക് ശാഖയ്ക്ക് അനുസരിച്ച് സാധാരണ സേവിങ്സ് അക്കൗണ്ടുകളില്‍ ഉപഭോക്താ 
ക്കള്‍ 1,000 രൂപ മുതല്‍ 3,000 രൂപ വരെ തന്നെയാണ് പ്രതിമാസ ബാലന്‍സായി നില നിര്‍ത്തേണ്ടത്.അക്കൗണ്ടിലെ ബാലന്‍സിന് അനുസരിച്ചായിരിക്കും പിഴ തുക ഈടാക്കുക. 

മെട്രോ നഗരങ്ങളിലും നഗര പ്രദേശങ്ങളിലുമുള്ള ബാങ്ക് അക്കൗണ്ട് ഉടമകള്‍ പ്രതിമാസം അക്കൗണ്ടില്‍ നില നിര്‍ത്തേണ്ട ഏറ്റവും കുറഞ്ഞ തുക 3,000 രൂപയാണ്.അര്‍ദ്ധ നഗരങ്ങളില്‍ ആണ് ബാങ്ക് അക്കൗണ്ട് എങ്കില്‍ അക്കൗണ്ടില്‍ 2,000 രൂപ നില നിര്‍ത്തേണ്ടി വരും. ഗ്രാമ പ്രദേശങ്ങളില്‍ ഉള്ളവര്‍ 1000 രൂപയാണ് മിനിമം ബാലന്‍സായി നില നിര്‍ത്തേണ്ടത്. 

മെട്രോ നഗരങ്ങളിലും നഗരങ്ങളിലും 10 രൂപ+ ജി.എസ്.ടി മുതല്‍ 15 രൂപ+ ജി.എസ്.ടി വരെ പിഴ ഈടാക്കും. 
അതേസമയം അര്‍ദ്ധ നഗരങ്ങളില്‍ ആണ് ബാങ്ക് ബ്രാഞ്ച് എങ്കില്‍ 7.5 രൂപ+ ജി.സി.ടി മുതല്‍ 12 രൂപ+ ജി.എസ്.ടി. വരെ പിഴയായി നല്‍കേണ്ടി വരും. ഗ്രാമ പ്രദേശങ്ങളില്‍ 5-10 രൂപ +ജിസ്.ടി ആകും പിഴയായി ഈടാക്കുക. രണ്ടു ലക്ഷം രൂപ മുതല്‍ അഞ്ച് ലക്ഷം രൂപ വരെയുള്ള ആര്‍.റ്റി.ജി.എസ് സേവനങ്ങള്‍ക്ക് 20 രൂപയും ജി.എസ്.ടിയുമാണ് നല്‍കേണ്ടത്.