ആറു ദിവസത്തിനിടെ രാജ്യത്ത് പെട്രോൾ വില 1.59 രൂപ വർധിച്ചു. ഡീസലിന് 1.39 രൂപയുടെ വർധനവാണ് രേഖപ്പെടുത്തിയിക്കുന്നത്. സൗദി അറേബ്യയയിലെ ആരാംകോയുടെ എണ്ണപ്പാടത്തിനും എണ്ണ സംസ്കരണ ശാലക്കും നേരെ കഴിഞ്ഞ ആഴ്ച യെമനിലെ ഹൂതി വിമതർ നടത്തിയ ആക്രമണത്തെ തുടർന്നാണ് ഇന്ധന വിലയിൽ വർധനയുണ്ടായത്. 

ഡൽഹിയിൽ ഞായറാഴ്ച പെട്രോളിന് 27 പൈസ കൂടി 73.62 രൂപയിലെത്തി. ഡീസലിന് 18 പൈസ വർധിച്ച് 66.74 രൂപ ആയി. സംസ്ഥാന തലസ്ഥാനമായ തിരുവനന്തപുരത്ത് പെട്രോളിന് 77.03 രൂപയും ഡീസലിന് 71. 82 രൂപയുമാണ് വിപണി വില. 

ആരാംകോയിലെ ആക്രമണത്തെ തുടർന്ന് സൗദി എണ്ണയുൽപ്പാദനം കുറച്ചിരുന്നു. എത്രയും വേഗം എണ്ണ  വിതരണം പുനഃസ്ഥാപിക്കാനാകുമെന്നാണ് സൗദി അറിയിച്ചിട്ടുള്ളത്.