വിപിന്‍ ആറ്റ്ലി സംവിധാനം ചെയ്ത മ്യൂസിക്കല്‍ ചെയര്‍ എന്ന സിനിമയുടെ വ്യാജപതിപ്പ് നവമാധ്യമങ്ങളില്‍ പ്രചരിച്ച സംഭവത്തില്‍ കേരള പൊലീസിന്റെ സൈബര്‍ഡോമും ഹൈടെടെക് ക്രൈം എന്‍ക്വയറി സെല്ലും അന്വേഷണം നടത്തും. ചിത്രം നവമാധ്യമങ്ങളില്‍ നിന്ന് നീക്കം ചെയ്യാനും സംഭവത്തിനു പിന്നില്‍ പ്രവര്‍ത്തിച്ചവര്‍ക്കെതിരെ നിയമനടപടി സ്വീകരിക്കാനും സംസ്ഥാന പൊലീസ് മേധാവി ലോക്നാഥ് ബെഹ്റ നിര്‍ദ്ദേശം നല്‍കിയിട്ടുണ്ട്. ചിത്രത്തിന്റെ നിര്‍മ്മാതാവായ അല്ലെന്‍ രാജന്‍ മാത്യു സംസ്ഥാന പൊലീസ് മേധാവിക്ക് നല്‍കിയ പരാതിയെത്തുടര്‍ന്നാണ് നടപടി.

ഒടിടി പ്ലാറ്റ്‌ഫോമായ മെയിന്‍സ്ട്രീം ആപ്പിലൂടെ ഇക്കഴിഞ്ഞ ഞായറാഴ്ചയാണ് സിനിമ റിലീസായത്. റിലീസിനു പിന്നാലെ ചിത്രത്തിന്റെ വ്യാജപതിപ്പുകള്‍ ടെലഗ്രാം ഗ്രൂപ്പുകളിലൂടെ പ്രചരിക്കുകയായിരുന്നു.

ഹോംലി മീല്‍സ്, ബെന്‍, വട്ടമേശ സമ്മേളനം എന്നീ ചിത്രങ്ങളിലൂടെ ശ്രദ്ധേയനായ വിപിന്‍ ആറ്റ്ലിയുടെ നാലാമത്തെ ചിത്രമാണ് 'മ്യൂസിക്കല്‍ ചെയര്‍'.