കോവിഡ് പ്രതിരോധത്തിനായുള്ള ലോക് ഡൗൺ കാലത്തെ ചാകരകോളാക്കി മാറ്റി നെറ്റ്ഫ്ലിക്സ്. സൈറ്റിന് ഒറ്റയടിക്ക് വർധിച്ചത് 1 .6 കോടി പുതിയ ഉപഭോക്താക്കളാണ്. ലോക് ഡൗൺ കാരണം മറ്റ് വിനോദങ്ങളും ഉല്ലാസയാത്രകളും നഷ്ടപ്പെട്ട ഒരു ജനത ഇത്തരം വീഡിയോ സ്ട്രീമിങ് വെബ്‌സൈറ്റുകളിൽ കയറിയാണ് ബോറടി മാറ്റിയിരുന്നതെന്നാണ് കണക്കുകൾ സൂചിപ്പിക്കുന്നത്. നെറ്ഫ്ലിക്സ് കൂടാതെ ആമസോണ്‍ പ്രൈം, ഡിസ്​നി ഹോട്​സ്​റ്റാര്‍, സീ5 എന്നീ ഓവര്‍ ദ ടോപ് തുടങ്ങിയ ഓൺലൈൻ പ്ലാറ്റുഫോമുകളുടെയും ഉപഭോക്താക്കളുടെ എണ്ണം വർധിച്ചു. ഈ വര്‍ഷത്തെ ആദ്യ മൂന്ന്​ മാസം കൊണ്ട്​ മാത്രം 1.6 കോടി ആളുകളാണ്​​ നെറ്റ്​ഫ്ലിക്​സില്‍ അക്കൗണ്ടുണ്ടാക്കിയത്​. എത്ര പണമുണ്ടാക്കിയാലും കറൻസിയുടെ മൂല്യം കുത്തനെ ഇടിഞ്ഞതിനാൽ ലഭിച്ച ലാഭം ഡോളറിലാക്കുമ്പോൾ കമ്പനിയ്ക്ക് ഭീമമായ നേട്ടമൊന്നും ഉണ്ടാകാൻ ഇടയില്ലെന്നാണ് റിപ്പോർട്ടുകൾ. ലോക് ഡൗൺ കാലാവധി നീളുന്നതോടെ സുപ്രധാന എതിരാളികളായ ആമസോണ്‍ പ്രൈമിനും ഡിസ്​നി പ്ലസിനും ഒപ്പം പിടിച്ച് നില്ക്കാൻ ഉള്ളടക്കങ്ങൾ മികവുറ്റതാക്കുന്നതിന്റെ തിരക്കിലാണ് ഇപ്പോൾ നെറ്റ്ഫ്ലിക്സ്.