അന്തരിച്ച ഇതിഹാസ ​ഗായിക ലത മങ്കേഷ്കറിന് ​ഗാനാഞ്ജലി അർപ്പിച്ച് കെ.എസ് ചിത്ര. 1969ൽ പുറത്തിറങ്ങിയ 'ചിരാ​ഗ്' എന്ന ചിത്രത്തിന് വേണ്ടി ലത മങ്കേഷ്കർ ആലപിച്ച 'തേരി ആങ്കോം' എന്ന ​ഗാനത്തിന്റെ കവർ വേർ‌ഷൻ ആലപിച്ചാണ് ചിത്ര ​ആദരമർപ്പിക്കുന്നത്. മജ്രൂഹ് സുൽത്താൻപുരിയുടെ വരികൾക്ക് മദൻ മോ​ഹനാണ് ഈണം നൽകിയിരിക്കുന്നത്. ചിത്രയുടെ യൂട്യൂബ് ചാനലിലൂടെയാണ് വീഡിയോ പുറത്ത് വിട്ടിരിക്കുന്നത്. ഇക്കഴിഞ്ഞ ഞായറാഴ്ച്ചയാണ് ഇതിഹാസ ​ഗായിക ലത മങ്കേഷ്കർ വിടവാങ്ങുന്നത്.കോവി‍ഡ് ബാധിതയായി  മുംബൈ ബ്രീച്ച് കാൻഡി ആശുപത്രിയിൽ ചികിത്സയിലിരിക്കെയായിരുന്നു അന്ത്യം.  കോവിഡും ന്യൂമോണിയയും ബാധിച്ച് ജനുവരി 8നാണ് ലത മങ്കേഷ്കറെ ആശുപത്രിയിൽ പ്രവേശിപ്പിക്കുന്നത്. കോവിഡ് മുക്തയായെങ്കിലും ആരോ​ഗ്യനില വഷളായതിനെത്തുടർന്ന് ​ഗായികയെ വെന്റിലേറ്ററിൽ പ്രവേശിപ്പിച്ചിരുന്നു.