തനിക്ക് വധഭീഷണിയെന്ന് നടി കങ്കണ റണാവത്ത്. കർഷക സമരത്തെ വിമർശിച്ചതുകൊണ്ടാണ് തനിക്കെതിരെ വധഭീഷണിയെന്നും വധഭീഷണി മുഴക്കിയവർക്കെതിരെ താൻ പരാതി നൽകിയിട്ടുണ്ടെന്നും അവർ ഇൻസ്റ്റ​ഗ്രാമിലൂടെ അറിയിച്ചു.  എഫ്‌ഐആറിൻറെ പകർപ്പടക്കം ഇൻസ്റ്റാഗ്രാമിൽ പങ്കുവെച്ചാണ് നടി ഇക്കാര്യം അറിയിച്ചത്.“മുംബൈ ഭീകരാക്രമണത്തിലെ രക്തസാക്ഷികളെ അനുസ്മരിച്ചുകൊണ്ട്, രാജ്യദ്രോഹികളോട് ഒരിക്കലും ക്ഷമിക്കുകയോ മറക്കുകയോ ചെയ്യരുത് എന്നാണ് ഞാൻ എഴുതിയത്. ഇത്തരത്തിലുള്ള സംഭവങ്ങളിൽ രാജ്യത്തിനുള്ളിലെ വഞ്ചകർക്ക് പങ്കുണ്ട്. പണത്തിനും ചിലപ്പോൾ സ്ഥാനത്തിനും അധികാരത്തിനും വേണ്ടി രാജ്യദ്രോഹികൾ ഭാരതാംബയെ അപകീർത്തിപ്പെടുത്തുന്നു. അവർ ദേശവിരുദ്ധ ശക്തികളെ ഗൂഢാലോചനകളിൽ സഹായിക്കുന്നു.” കങ്കണ കുറിച്ചു.