വിദഗ്ധ ചികിത്സയ്ക്ക് നടൻ രജനികാന്ത് വിദേശത്തേക്ക്. രജനി രാഷ്ട്രീയ പ്രവേശനത്തിൽ നിന്ന് പിൻമാറിയതിനെ തുടർന്നുള്ള പ്രതിഷേധങ്ങൾക്കിടെയാണ് ജനുവരി 14ന് സിംഗപ്പൂരിലേയ്ക്ക് പോകാൻ അദ്ദേഹം തീരുമാനിച്ചിരിക്കുന്നത്. ആരാധകരുടെ പ്രതിഷേധം ശക്തമായതിന് ഇടയിലാണ് ചെന്നൈയിൽ നിന്ന് മാറിനിൽക്കാനുള്ള തീരുമാനം അദ്ദേഹം എടുത്തിരിക്കുന്നത്.

പ്രതിഷേധങ്ങളുടെ ഭാഗമായി സ്വയം തീകൊളുത്തിയ ആരാധകൻ ഗുരുതരാവസ്ഥയിൽ ആശുപത്രിയിൽ ചികിത്സയിലാണ്. പ്രഖ്യാപനത്തിനു പിന്നാലെ രജനികാന്തിന്റെ വീടിനു മുന്നിൽ വച്ചാണ് ചെന്നൈ സ്വദേശിയായ മുരുകേശൻ സ്വയം തീകൊളുത്തിയത്. ആരോഗ്യ പ്രശ്നങ്ങളെ തുടർന്നാണ് രാഷ്ട്രീയ പ്രവേശനത്തിൽ നിന്ന് പിന്മാറിയതെന്ന് മൂന്ന് പേജുള്ള ട്വിറ്റർ സന്ദേശത്തിൽ രജനികാന്ത് അറിയിച്ചിരുന്നു.