സാമുദായിക സംഘർഷം വളർത്തുന്ന തരത്തിൽ സമൂഹമാധ്യമങ്ങളിലൂടെ പ്രചാരണം നടത്തിയതിന് ബോളിവുഡ് നടി കങ്കണാ റണൗട്ടിനെയും സഹോദരി രംഗോലി ചന്ദേലിനെയും മുംബൈ പൊലീസ് വിളിപ്പിച്ചു. ഈ മാസം 23, 24 തിയതികളിൽ ബാന്ദ്ര പൊലീസിന് മുൻപിൽ ഹാജരാകാനാണ് നിർദ്ദേശിച്ചിരിക്കുന്നത്. ബാന്ദ്ര മെട്രോപൊളിറ്റൻ മജിസ്ട്രേറ്റ് കോടതി ഉത്തരവിനെ തുടർന്ന് മുംബൈയിലെ ബാന്ദ്ര പൊലീസ് കേസ് രജിസ്റ്റർ ചെയ്യുകയായിരുന്നു. സാമുദായിക സംഘർഷം വളർത്തും വിധത്തിൽ പ്രചാരണം നടത്തിയെന്നും ആരോപണങ്ങൾ ഉന്നയിച്ചുവെന്നും ചൂണ്ടിക്കാട്ടി ബോളിവുഡ് കാസ്റ്റിങ് ഡയറക്ടർ മുനവർ അലി സയ്യിദ് സമർപ്പിച്ച ഹർജിയിലായിരുന്നു കോടതി നടപടി.