പ്രശസ്ത തെലുങ്ക് ചലച്ചിത്രതാരവും രാഷ്ട്രീയ നേതാവുമായ ചിരഞ്ജീവിക്ക് കൊവിഡ് ബാധയില്ല. ആദ്യപരിശോധനയിൽ പോസിറ്റീവാണെന്ന് കണ്ടെത്തിയതിനെ തുടർന്ന് താരം നിരീക്ഷണത്തിൽ പ്രവേശിച്ചിരുന്നു. ശേഷം മൂന്ന് വ്യത്യസ്ത പരിശോധനകൾ നടത്തിയതിലൂടെ താരത്തിന് കൊവിഡില്ലെന്ന് സ്ഥിരീകരിച്ചു. മുമ്പ് നടത്തിയ പരിശോധനയിൽ ആർടി പിസിആർ കിറ്റിൻറെ തകരാറുമൂലമാണ് ഫലം പോസിറ്റീവായതെന്ന് താരം ഇപ്പോൾ അറിയിച്ചു. കൊവിഡ് പോസിറ്റീവ് ഫലം പുറത്തറിഞ്ഞപ്പോൾ എല്ലാവരും നൽകിയ സ്നേഹത്തിനും ആത്മവിശ്വാസത്തിനും നന്ദി അറിയിക്കുന്നതായും ചിരഞ്ജീവി കൂട്ടിച്ചേർത്തു.