ശബരിമലയിൽ ആദ്യ ദിനം മല ചവിട്ടാൻ എത്തിയത് 4986 പേർ മാത്രം. ബുക്കിങ് നടത്തിയിരുന്ന 25000 പേരിൽ 20014 പേർ ആദ്യ ദിവസം ദർശനത്തിന് എത്തിയില്ല. പ്രതികൂല കാലാവസ്ഥ കണക്കിലെടുത്ത് ആദ്യ മൂന്ന് ദിവസങ്ങളിൽ ശബരിമലയിലേക്കുള്ള യാത്ര ഒഴിവാക്കാൻ കഴിയുന്നവർ ഒഴിവാക്കണമെന്ന് സർക്കാർ അഭ്യർത്ഥിച്ചിരുന്നു.ബുക്കിങ് നടത്തിയിട്ട് വരുന്ന മൂന്ന് ദിവസങ്ങളിൽ എത്താൻ കഴിയാത്തവർക്ക് 18 ന് ശേഷം ദർശനം നടത്താമെന്നാണ് ദേവസ്വം ബോർഡ് മന്ത്രി കെ. രാധക്യഷ്‌ണൻ സന്നിധാനത്ത് വ്യക്തമാക്കിയത്. ആദ്യ ദിവസം കൂടുതലായി എത്തിയത് ആന്ധ്രയിൽ നിന്നുമുള്ള തീർത്ഥാടകരായിരുന്നു. തമിഴ്‌നാട്, കർണാടക സംസ്ഥാനങ്ങളിൽ നിന്നും ഭക്തരുടെ വരവുണ്ടായി. മലയാളി ഭക്തരുടെ എണ്ണം കുറവായിരുന്നു.