തിരുവിതാംകൂർ ദേവസ്വം ബോർഡിന് കീഴിലുള്ള ക്ഷേത്രങ്ങളിൽ നാളെ മുതൽ ഭക്തർക്ക് പ്രവേശനം ഇല്ല. ലോക്ക് ഡൗണിൻറെ പശ്ചാത്തലത്തിലാണ് ദേവസ്വം ബോർഡിൻറെ തീരുമാനം.എന്നാൽ ക്ഷേത്രങ്ങളിൽ പൂജകൾ മുടങ്ങാതെ നടക്കും. രാവിലെ 7 മണി മുതൽ 10 മണി വരെയും വൈകുന്നേരം 5 മണി മുതൽ 7 മണി വരെയായും പൂജ സമയം ക്രമീകരിക്കും. ഉത്സവങ്ങളടക്കം മറ്റ് യാതൊരു ചടങ്ങുകളും അനുവദിക്കില്ല.നിലവിൽ ബുക്ക് ചെയ്തിരിക്കുന്ന വിവാഹങ്ങൾ കൊവിഡ് മാനദണ്ഡങ്ങൾ പാലിച്ച് ക്ഷേത്രത്തിന് പുറത്ത് വെച്ച് നടത്താം. എന്നാൽ പരമാവധി 20 പേർ മാത്രമെ വിവാഹത്തിൽ പങ്കെടുക്കാൻ സാധിക്കുകയുള്ളു.കൊവിഡ് വ്യാപനത്തെതുടർന്ന് ശബരിമലയിൽ ഭക്തജനങ്ങൾക്ക് പ്രവേശനം നിഷേധിച്ചിരിക്കുകയാണ്. ശബരിമലയിൽ ഇനി സാധാരണ പൂജകൾ മാത്രമായിരിക്കും ഉണ്ടാവുക.