സംസ്ഥാന സർക്കാരിന്റെ ജാഗ്രത നിർദ്ദേശം ലംഘിച്ച് സിഐടിയു. കൊറോണ വൈറസ് ഭീതിപടർത്തുന്ന പശ്ചാത്തലത്തിൽ പൊതുപരിപാടികൾ സംഘടിപ്പിക്കരുതെന്ന സർക്കാർ നിർദ്ദേശത്തെയാണ് സിഐടിയു ലംഘിച്ചത്. തൃശ്ശൂർ സാഹിത്യ അക്കാദമി ഹാളിലാണ് സിഐടിയു ജില്ലാ കൗൺസിൽ യോഗം വിളിച്ചുചേർത്തത്. സ്ത്രീകളും കുട്ടികളുമടക്കം ഇരുന്നൂറോളം പേരാണ് യോഗത്തിൽ പങ്കെടുത്തത്. സംഭവം വിവാദമായതോടെ യോഗം നിർത്തണമെന്നാവശ്യപ്പെട്ട് ജില്ലാ കളക്ടർ നിർദ്ദേശം നൽകിയെങ്കിലും യോഗം തുടർന്നു. യോഗത്തിനെതിരെ നിരവധി പരാതികളാണ് കളക്ടറേറ്റിൽ എത്തിയിട്ടുള്ളത്. അതിനിടെ  സിഐടിയു ജില്ലാ സെക്രട്ടറിക്ക് എതിരെ കേസെടുക്കണമെന്നാവശ്യപ്പെട്ട് കെഎസ്‍യു ജില്ലാ നേതൃത്വം ജില്ലാ കളക്ടർക്ക് പരാതി നൽകി. അതീവ ജാഗ്രതയോടെ സർക്കാർ മുന്നോട്ടുപോകുന്ന സാഹചര്യത്തിനിടയിലാണ് ഇടത് സംഘടനയായ സിഐടിയു തന്നെ ഈ നിർദേശങ്ങളെല്ലാം ലംഘിക്കുന്നത്.