അധികാരത്തിൽ തുടരാനുള്ള ശ്രമത്തിൽ നേപ്പാളിലെ പ്രധാനമന്ത്രി കെപി ശർമ്മ ഒലി മെയ് 10 ന് പാർലമെൻറിൽ വിശ്വാസവോട്ടെടുപ്പ് നേരിടും. പ്രധാനമന്ത്രി ഒലിയുടെ ശുപാർശ പ്രകാരം പ്രസിഡൻറ് ബിദ്യാദേവി ഭണ്ഡാരി മെയ് 10 ന് പാർലമെൻറ് സമ്മേളനം വിളിച്ച് തൻറെ സർക്കാരിൽ വിശ്വാസ വോട്ടെടുപ്പ് നടത്തുമെന്ന് ഞായറാഴ്ച പുറത്തിറക്കിയ ഔദ്യോഗിക പ്രസ്‌താവനയിൽ പറഞ്ഞു.

പാർലമെൻറിലെ 275 അംഗ ജനപ്രതിനിധിസഭയിൽ  ഒലിക്ക് റഞ്ഞത് 136 വോട്ടുകൾ ആവശ്യമാണ്. നാല് അംഗങ്ങൾ നിലവിൽ സസ്പെൻഷനിലാണ്. അധികാരത്തിൽ തുടരാനുള്ള പാർലമെൻറിൻറെ വിശ്വാസം നേടിയെടുക്കാൻ ശ്രമിക്കുമെന്ന് ഞായറാഴ്‌ച നടന്ന മന്ത്രിസഭാ യോഗത്തിൽ ഒലി പറഞ്ഞു. കഴിഞ്ഞ വർഷം ഡിസംബറിൽ ജനപ്രതിനിധിസഭ പിരിച്ചുവിടാനുള്ള പ്രധാനമന്ത്രിയുടെ വിവാദ നീക്കത്തിനുശേഷം നിലവിൽ വന്ന രാഷ്ട്രീയ സ്ഥിതിഗതികൾക്കിടയിലാണ് ഒലിയുടെ തീരുമാനം.