ശ്രീനാരായണ ഗുരുദേവന്റെ 166-ാമത്  ജയന്തിദിനത്തില്‍ സംസ്ഥാനത്ത് കരിദിനം ആചരിക്കാനുള്ള തീരുമാനത്തില്‍ നിന്നും സിപിഎം പിന്മാറണമെന്ന് ബിഡിജെഎസ്  സംസ്ഥാന അദ്ധ്യക്ഷന്‍ സുഭാഷ് വാസു ആവശ്യപ്പെട്ടു.  ചതയ ദിനത്തിന്റെ പ്രാധാന്യം അപ്രസക്തമാക്കാനുള്ള ബോധപൂര്‍വമായ ശ്രമമാണ് ഇതിനു പിന്നില്‍.  

ശിവഗിരി തീര്‍ത്ഥാടന ദിനമായ ജനുവരി ഒന്നിന് വനിതാ മതില്‍ തീര്‍ത്തതിന്റെ തനിയാവര്‍ത്തനമാണ് ഇതെന്നും സുഭാഷ് വാസു പ്രസ്താവനയില്‍ പറഞ്ഞു.   മാത്രമല്ല ഗുരുദേവന്റെ ജന്മദിനം കരിദിനമാക്കാനുള്ള സിപിഎം നീക്കം ലക്ഷക്കണക്കിന് ശ്രീനാരായണരോടുള്ള വെല്ലുവിളിയാണെന്ന് അദ്ദേഹം പ്രസ്താവനയില്‍ പറഞ്ഞു.  

ശ്രീനാരായണീയര്‍ ഏറെ പവിത്രമായി കാണുന്ന ഗുരുദേവ ജന്മദിനത്തിന്റെ ശോഭകെടുത്താനാണോ സിപിഎം ശ്രമിക്കുന്നതെന്ന് സംശയിക്കേണ്ടിയിരിക്കുന്നു.  സംസ്ഥാനത്തിന്റെ വിവിധ ഭാഗങ്ങളില്‍ ശ്രീനാരായണീയ സമൂഹം ഒത്തുച്ചേരുന്ന ദിവസം  കരിദിനം വരുന്നത് ആശങ്കാജനകമാണെന്നും സുഭാഷ് വാസു പറഞ്ഞു.