റഷ്യൻ ആക്രമണത്തിൽ യുക്രെയ്‌നിൽ കനത്ത ആൾനാശം. ഇരുഭാഗത്ത് നിന്നും മരണ സംഖ്യ ഉയരുന്നതായി റിപ്പോർട്ടുകൾ. ഇതിൽ സാധാരണക്കാരും ഉൾപ്പെടുന്നു. രാജ്യത്ത് അതിക്രമിച്ച് കടന്ന 50 റഷ്യൻ സൈനികരെ കൊലപ്പെടുത്തിയതായി യുക്രൈൻ അധികൃതർ അറിയിച്ചു. സൈനികരും പൗരൻമാരുമടക്കം 50ഓളം യുക്രെയ്ൻ സ്വദേശികളും കൊല്ലപ്പെട്ടു.യുക്രെയ്‌ൻ തലസ്ഥാനമായ കീവിൽനിന്നു പലായനം തുടരുകയാണ്. പോളണ്ട് ഉൾപ്പെടെയുള്ള സമീപരാജ്യങ്ങളിലേക്ക് അഭയാർഥികളുടെ പ്രവാഹമാണ്. നഗരങ്ങളിൽ ഉൾപ്പെടെ റഷ്യൻ സേന ആക്രമണം നടത്തിയെന്നു യുക്രെയ്ൻ പ്രസി‍ഡന്റ് വൊളൊഡിമിർ സെലെൻസ്കി അറിയിച്ചു. 

വ്യോമാക്രമണത്തിന് പിന്നാലെ റഷ്യൻ കരസേനയും അതിർത്തി ഭേദിച്ച് യുക്രെയ്ൽ പ്രവേശിച്ചു. യുക്രെയ്നിൻറെ കര, നാവിക, വ്യോമ കേന്ദ്രങ്ങളിലാണ് കനത്ത ആക്രമണം നടത്തിയത്. വടക്ക് ബെലറൂസ്, തെക്ക് ഒഡേസ, കിഴക്ക് ഡോൺബാസ് എന്നീ അതിർത്തികൾ വഴിയും കരിങ്കടൽ വഴിയുമാണ് ആക്രമണം. കിയവ് കൂടാതെ യുക്രെയ്നിലെ വടക്ക് കിഴക്ക് ഭാഗത്തെ വലിയ നഗരമായ കർക്കീവ്, ക്രമറ്റോസ്, ഡിപ്രോ, മരിയ പോൾ, ഒഡേസ, സെപോർസിയ എന്നിവിടങ്ങളിൽ വ്യോമാക്രമണം നടന്നതായി രാജ്യാന്തര മാധ്യമങ്ങൾ റിപ്പോർട്ട് ചെയ്തു. റഷ്യൻ പ്രസിഡന്റ് വ്ലാഡിമിർ പുടിന്റെ യുദ്ധപ്രഖ്യാപനത്തിനു മണിക്കൂറുകൾക്കകം യുക്രെയ്നിലെ വ്യോമത്താവളങ്ങളും പ്രതിരോധസംവിധാനങ്ങളും നിർവീര്യമാക്കിയതായി റഷ്യൻ പ്രതിരോധ മന്ത്രാലയത്തിന്റെ വാർത്താക്കുറിപ്പിൽ പറയുന്നു.