2022ലെ ഐപിഎൽ ടൂർണമെന്റ് ഏപ്രിൽ രണ്ടിന് ആരംഭിക്കും.  ചെന്നൈയാണ് ഉദ്ഘാടന മത്സര വേദി. പത്ത് ടീമുകളായിരിക്കും ഐ.പി.എല്ലിൽ ഉണ്ടാവുകയെന്നാണ് റിപ്പോർട്ട്. അഹമ്മദാബാദ്, ലഖ്‌നൗ എന്നീ നഗരങ്ങളിൽ നിന്നാണ് പുതിയ രണ്ട് ടീമുകൾ ഐ.പി.എല്ലിലേക്ക് വന്നത്. അതുകൊണ്ടുതന്നെ മത്സരങ്ങളുടെയും ദിവസങ്ങളുടെയും എണ്ണം വർധിക്കും. നിലവിലെ സാഹചര്യത്തിൽ അറുപതിലധികം ദിവസങ്ങൾ എടുത്താൽ മാത്രമേ ടൂർണമെന്റ് പൂർത്തിയാക്കാനാകൂ. അങ്ങനെവരുമ്പോൾ  ജൂൺ ആദ്യവാരമായിരിക്കും ഫൈനൽ. 2022 ഐ.പി.എൽ ഇന്ത്യയിൽ വെച്ചുതന്നെ നടത്തുമെന്ന് ബി.സി.സി.ഐ സെക്രട്ടറി ജയ് ഷാ നേരത്തേ അറിയിച്ചിരുന്നു. കഴിഞ്ഞ സീസൺ ഇന്ത്യയിൽ വെച്ച് ആരംഭിച്ചെങ്കിലും കോവിഡ് വ്യാപനം മൂലം പാതി വഴിയിൽ നിർത്തേണ്ടിവന്നു. പിന്നീട് യു.എ.ഇയിൽ വെച്ചാണ് മത്സരങ്ങൾ പൂർത്തീകരിച്ചത്.