ആലുവ കീഴ്മാട് ഗാർഹിക പീഡനത്തിനിരയായെന്നു പരാതി നൽകിയ യുവതി ആത്മഹത്യ ചെയ്ത നിലയിൽ. ആലുവ എടയപ്പുറം സ്വദേശി മോഫിയ പർവീൺ (23) ആണ് ജീവനൊടുക്കിയത്. മോഫിയയുടെ ആത്മഹത്യാക്കുറിപ്പിൽ ഭർത്താവ്, അയാളുടെ മാതാപിതാക്കൾ, സർക്കിൾ ഇൻസ്പെക്ടർ എന്നിവർക്കെതിരെ പരാമർശമുണ്ട്.

തൊടുപുഴയിൽ സ്വകാര്യ കോളജിൽ എൽഎൽബി വിദ്യാർഥിയായ മോഫിയ ഫെയ്സ്ബുക്കിലൂടെ പരിചയപ്പെട്ടയാളെയാണ് വിവാഹം കഴിച്ചത്. ഭർത്താവും വീട്ടുകാരും പീഡിപ്പിക്കുന്നെന്നു മോഫിയ നൽകിയ പരാതിയിൽ ആലുവ പൊലീസ് ഇന്നലെ ഇവരെ സ്റ്റേഷനിലേക്കു വിളിപ്പിച്ചിരുന്നു. സംസാരത്തിനിടെ വാക്കുതർക്കമുണ്ടായതെത്തുടർന്ന് ക്ഷുഭിതയായ മോഫിയ ഭർത്താവിന്റെ മുഖത്തടിച്ചെന്ന് പൊലീസ് പറഞ്ഞു. തുടർന്ന് വീട്ടിലെത്തിയ യുവതിയെ ജീവനൊടുക്കിയ നിലയിൽ കണ്ടെത്തുകയായിരുന്നു.അതേസമയം, സ്റ്റേഷനിൽ‌വച്ച് വാക്കുതർക്കത്തിനിടെ മോഫിയ ഭർത്താവിന്റെ മുഖത്തടിച്ചെന്നും ഇത്തരം കാര്യങ്ങൾ പാടില്ലെന്നു പറയുകയാണുണ്ടായതെന്നുമാണ് പൊലീസ് പറയുന്നത്.