കെഎസ്ആർടിസിക്ക് പിന്നാലെ സംസ്ഥാനത്തെ സ്വകാര്യ ബസുകളും സമരത്തിലേക്ക്. യാത്ര നിരക്ക് വർധിപ്പിക്കണമെന്നാവശ്യപ്പെട്ട് സംസ്ഥാനത്തെ സ്വകാര്യ ബസുകൾ നവംബർ 9 മുതൽ അനിശ്ചിത കാലത്തേക്ക് സർവീസ് നിർത്തിവയ്ക്കും. ഡീസൽ വില വർധിച്ച സാഹചര്യത്തിൽ നിലവിലുള്ള നിരക്കുമായി സർവീസ് നടത്താനാകില്ലെന്നാണ് ബസ് ഉടമകൾ വ്യക്തമാക്കുന്നത്.കൊവിഡ് മൂലമുള്ള യാത്രക്കാരുടെ കുറവ് കാരണം സ്വകാര്യ ബസുകൾ വലിയ നഷ്‌ടത്തിലാണ് മുന്നോട്ടു പോകുന്നത്. 2018ൽ ഡീസലിനു ലീറ്ററിനു 62 രൂപയുണ്ടായിരുന്നപ്പോൾ നിശ്ചയിച്ച മിനിമം നിരക്കാണ് 8 രൂപ എന്നത്. നിലവിലെ സാഹചര്യത്തിൽ മിനിമം ചാർജ് 12 രൂപയാക്കുകയും കിലോമീറ്റർ നിരക്ക് 1 രൂപയാക്കുകയും വേണമെന്നു ബസ് ഉടമകൾ ആവശ്യപ്പെടുന്നു.വിദ്യാർഥികളുടെ മിനിമം ചാർജ് 6 രൂപയാക്കി വർധിപ്പിക്കുക, തുടർന്നുള്ള നിരക്ക് യാത്രാ ചാർജിൻറെ 50 ശതമാനമായി നിജപ്പെടുത്തുക, കൊവിഡ് കാലം കഴിയും വരെ സ്വകാര്യ ബസുകളുടെ വാഹന നികുതി പൂർണമായും ഒഴിവാക്കുക എന്നീ ആവശ്യങ്ങളും ബസ് ഉടമകൾ ഉന്നയിക്കുന്നുണ്ട്.