പൊലീസ് ഉദ്യോഗസ്ഥർ പൊതുജനങ്ങളെ എടാ, എടീ എന്നു വിളിക്കേണ്ടതില്ലെന്നും സഭ്യമായ ഭാഷയിൽ അഭിസംബോധന ചെയ്യണമെന്നും ഡിജിപി അനിൽകാന്തിൻറെ സർക്കുലർ. പൊതു ജനങ്ങളോടുള്ള പൊലീസ് ഉദ്യോഗസ്ഥരുടെ പെരുമാറ്റം ജില്ലാ സ്പെഷ്യൽ ബ്രാഞ്ച് സസൂക്ഷ്മം നിരീക്ഷിക്കും.

പത്ര - ദൃശ്യ മാധ്യമങ്ങൾ വഴിയോ, സാമൂഹ്യ മാധ്യമങ്ങൾ വഴിയോ ഇത്തരം സംഭവങ്ങൾ ശ്രദ്ധയിൽപ്പെട്ടാൽ ബന്ധപ്പെട്ട യൂണിറ്റ് മേധാവി ഉടൻ തന്നെ വിശദമായ അന്വേഷണം നടത്തി അച്ചടക്ക നടപടി സ്വീകരിക്കണമെന്നും നിർദേശമുണ്ട്.പൊലീസുദ്യോഗസ്ഥർ പൊതുജനങ്ങളുമായി ഇടപഴകുമ്പോൾ വളരെ മാന്യമായും വിനയത്തോടെയും മാത്രമേ പെരുമാറാവൂ എന്ന് കർശന നിർദേശമുണ്ട്. സേനയുടെ സൽപ്പേരിന് അപകീർത്തി ഉണ്ടാക്കുന്ന സാഹചര്യങ്ങൾ സംഭവിക്കാതിരിക്കാൻ യൂണിറ്റ് മേധാവിമാർ പ്രത്യേകം ശ്രദ്ധ ചെലുത്തണം തുടങ്ങിയ നിർദേശങ്ങളാണ് സർക്കുലറിലുള്ളത്.പൊതുജനത്തോടുള്ള പൊലീസിൻറെ പെരുമാറ്റം സംബന്ധിച്ച് നിരന്തര പരാതികൾ ഉയർന്നതിൻറെ പശ്ചാത്തലത്തിൽ ഹൈക്കോടതി പുറപ്പെടുവിച്ച വിധിയുടെ അടിസ്ഥാനത്തിലാണ് ഡിജിപിയുടെ സർക്കുലർ.