ആവശ്യപ്പെടുന്നവർക്ക് കോവിഷീൽഡ് വാക്സീന്റെ രണ്ടാം ഡോസ് നാലാഴ്ച കഴിയുമ്പോൾതന്നെ നൽകാൻ ഹൈക്കോടതി ഉത്തരവിട്ടു. കോവിൻ പോർട്ടലിൽ ഇതനുസരിച്ചു വേണ്ട മാറ്റങ്ങൾ വരുത്താനും കേന്ദ്ര ആരോഗ്യ കുടുംബക്ഷേമ സെക്രട്ടറിക്കു ജസ്റ്റിസ് പി.ബി. സുരേഷ്കുമാർ നിർദേശം നൽകി. നിലവിൽ 84–112 ദിവസത്തിനകമേ രണ്ടാം ഡോസ് എടുക്കാനാകൂ.തൊഴിലാളികൾക്ക് രണ്ടാം ഡോസ് വാക്സീൻ നൽകാൻ അനുമതി ആവശ്യപ്പെട്ട് കിറ്റെക്സ് നൽകിയ ഹർജിയാണു കോടതി പരിഗണിച്ചത്. ഏകദേശം 12,000 തൊഴിലാളികൾക്കായി കമ്പനി 93 ലക്ഷം രൂപയ്ക്കു വാങ്ങിയ രണ്ടാം ഡോസ് വാക്സീൻ 84 ദിവസത്തിനു മുൻപു നൽകാൻ അനുവദിക്കണമെന്നായിരുന്നു ആവശ്യം. എന്നാൽ വിദഗ്ധരുടെ അഭിപ്രായവും ശാസ്ത്രീയ തെളിവുകളും കണക്കിലെടുത്ത് കൂടുതൽ ഫലപ്രാപ്തിക്കായാണ് 84 ദിവസം ഇടവേള നിശ്ചയിച്ചതെന്നായിരുന്നു കേന്ദ്ര നിലപാട്.