വനിതകൾക്ക് സെപ്റ്റംബർ അഞ്ചിന് നടക്കുന്ന നാഷണൽ ഡിഫൻസ് അക്കാദമിയുടെ പരീക്ഷയിൽ പങ്കെടുക്കാമെന്ന് സുപ്രീംകോടതി. രാജ്യത്തിന്റെ സായുധസേനയിലെ വനിതപ്രാതിനിധ്യത്തിന്റെ കാര്യത്തിൽ ഇടുങ്ങിയ മനസ്ഥിതിയുമായി നടക്കുന്നവരെ സുപ്രീംകോടതി വിമർശിച്ചു.

മാനസികാവസ്ഥയുടെ പ്രശ്‌നമാണിത്. കേസിൽ ഉത്തരവിറക്കാൻ നിർബന്ധിക്കരുത്. ഇക്കാര്യത്തിലെ നയപരമായ തീരുമാനം സ്ത്രീ-പുരുഷ വിവേചനം സൃഷ്ടിക്കുന്നതാണ്. നിർദേശത്തിന്റെ അടിസ്ഥാനത്തിൽ ഇക്കാര്യത്തിൽ പുരോഗമനപരമായ മാറ്റങ്ങളുണ്ടാവണമെന്നും കോടതി ആവശ്യപ്പെട്ടു.ജസ്റ്റിസുമാരായ എസ്.കെ.കൗൾ, ഋഷികേശ് റോയ് എന്നിവരുൾപ്പെട്ട ബെഞ്ചിന്റേതാണ് സുപ്രധാന നിരീക്ഷണം. സ്ത്രീകൾക്കും പുരുഷൻമാർക്കും തുല്യ അവസരം നൽകണമെന്ന വിവിധ കോടതി വിധികൾ എൻ.ഡി.എ പരീക്ഷയുമായി ബന്ധപ്പെട്ട് ലംഘിച്ചതിലും ജസ്റ്റിസുമാർ അതൃപ്തി രേഖപ്പെടുത്തി.