കേന്ദ്ര സർക്കാരിന്റെ അനുമതി ലഭിച്ചാൽ സംസ്ഥാനത്തെ സ്കൂളുകൾ ഘട്ടംഘട്ടമായി തുറക്കുമെന്ന് വിദ്യാഭ്യാസ മന്ത്രി വി. ശിവൻകുട്ടി. ഓൺലൈൻ പഠനം കുട്ടികളിൽ ആരോഗ്യപ്രശ്നങ്ങൾ ഉണ്ടാക്കുന്നുണ്ടെന്നും വിദ്യാഭ്യാസ മന്ത്രി നിയമസഭയിൽ പറഞ്ഞു. ഓൺലൈൻ പഠനം ശാശ്വതമല്ലെന്നും മന്ത്രി വ്യക്തമാക്കി.

‘സ്‌കൂളുകൾ ഘട്ടം ഘട്ടമായി തുറക്കുക എന്ന രീതിയാണ് സർക്കാർ പരിഗണിക്കുന്നത്. ഇതിന് കേന്ദ്രത്തിന്റെയും കോവിഡ് നിയന്ത്രണ അതോറിറ്റിയുടെയും അനുമതി ആവശ്യമാണ്. അനുമതി ലഭിച്ചാലുടൻ കുട്ടികൾക്ക് വാക്‌സിനേഷൻ ഉൾപ്പെടെ നടപ്പാക്കും. ഓൺലൈൻ പഠനം ശാശ്വതമായ ഒന്നല്ല, ഡിജിറ്റൽ ഓൺലൈൻ ക്ലാസുകൾ കുട്ടികളിൽ ആരോഗ്യപ്രശ്‌നങ്ങൾ ഉണ്ടാക്കുന്നു’- ശിവൻകുട്ടി പറഞ്ഞു.ഓൺലൈൻ ക്ലാസുകൾ മൂലം 36ശതമാനം പേരിൽ കഴുത്ത് വേദന, 28 ശതമാനം പേർക്ക് കണ്ണ് വേദന, 36 ശതമാനം പേർക്ക് തലവേദന തുടങ്ങിയ ആരോഗ്യപ്രശ്നങ്ങളുണ്ടെന്ന് എസ്‌സിആർടി പഠനത്തെ ഉദ്ദരിച്ച് മന്ത്രി സഭയിൽ പറഞ്ഞു. ഇത് പരിഹരിക്കുന്നതിനായി കുട്ടികളുമായി രക്ഷകർത്താക്കൾ കൂടുതൽ സംവദിക്കണം എന്നും വിദ്യാഭ്യാസ മന്ത്രി ആവശ്യപ്പെട്ടു.