നിയമസഭ സമ്മേളനം വ്യാഴാഴ്ച (ജൂലൈ 21) ആരംഭിക്കും. പതിനഞ്ചാം നിയമസഭയുടെ രണ്ടാം സമ്മേളനമാണ് ചേരുന്നത്. ഓഗസ്റ്റ് 18 വരെയാണ് സഭ സമ്മേളിക്കുന്നത്. ബഡ്‌ജറ്റിലെ ധനാഭ്യർഥനകളിലുള്ള ചർച്ചയും വോട്ടെടുപ്പുമാണ് സമ്മേളനത്തിൽ പ്രധാനമായും നടക്കുക.നാല് ദിവസം അനൗദ്യോഗികാംഗങ്ങളുടെ കാര്യത്തിനായും രണ്ട് ദിവസം 2021-22 വർഷത്തേക്കുള്ള ഉപധനാഭ്യർഥനകളുടെ ചർച്ചയ്ക്കും ധനാഭ്യർഥനകളുടെ ധനവിനിയോഗ ബില്ലിൻ്റെ പരിഗണനയ്ക്കും മാറ്റി വച്ചിട്ടുണ്ട്.നിയമ നിർമാണം ഏതെങ്കിലും ഉണ്ടെങ്കിൽ അതിന് വേണ്ടി വരുന്ന അധിക സമയം കാര്യോപദേശക സമിതി ചേർന്ന് തീരുമാനിക്കുമെന്നും സ്പീക്കർ എം.ബി രാജേഷ് പറഞ്ഞു. കൊവിഡ് മാനദണ്ഡങ്ങൾ പാലിച്ചായിരിക്കും സമ്മേളനം. രണ്ട് ഡോസ് കൊവിഡ് വാക്സിൻ എടുക്കാത്ത അംഗങ്ങൾക്ക് അതിനുള്ള സൗകര്യം ഒരുക്കുമെന്നും സ്പീക്കർ അറിയിച്ചു.മാത്യു കുഴൽനാടനെതിരെയുള്ള പരാതിയിൽ നടപടിക്രമങ്ങൾ അനുസരിച്ച് മുന്നോട്ട് പോകും. നവംബർ ഒന്നോടെ നിയമസഭ സമ്പൂർണമായി കടലാസ്‌ രഹിതമാക്കാനാണ് ലക്ഷ്യമിടുന്നതെന്നും സ്പീക്കർ പറഞ്ഞു.