ഗംഗാപൂരിലെ ഉദയ്​മോറിലാണ്​ സംഭവം. ഓക്​സിജൻ കോൺസെൻട്രേറ്റർ പൊട്ടിത്തെറിച്ചാണ് യുവതി മരിച്ചത്. അപകടത്തിൽ ഭർത്താവിന്​ ഗുരുതരമായി പരിക്കേറ്റു. ഭർത്താവ് സുൽത്താൻ സിങ്ങിന്​ കോവിഡ്​ ബാധിച്ച് ശ്വാസതടസം അനുഭവപ്പെട്ടതിനെ തുടർന്നാണ്​ ഭാര്യ സന്തോഷ്​ മീണ ഓക്​സിജൻ കോൺസെൻട്രേറ്റർ ഉപയോഗിച്ച്‌​ തുടങ്ങിയത്​. ഗേൾസ്​ ഹൈസ്​കൂളിൽ ഹെഡ്​മിസ്​ട്രസ്​ ആയിരുന്ന സന്തോഷ്​ മീണയായിരുന്നു സിങ്ങിനെ പരിചരിച്ചിരുന്നത്​.ശനിയാഴ്ച രാവിലെ മീണ ലൈറ്റ്​ ഓൺ ചെയ്​തതും ഓക്​സിജൻ കോൺസെൻട്രേറ്റർ പൊട്ടിത്തെറിക്കുകയായിരുന്നു. ഇരുവരെയും ആശുപത്രിയിലേക്ക്​ കൊണ്ടുപോകുന്ന വഴിയാണ്​ മീണ മരിച്ചത്​. ജയ്​പൂരിൽ വിദഗ്​ധ ചികിത്സക്കായി കൊണ്ടുപോയ സുൽത്താൻ സിങ്ങിൻറെ ആരോഗ്യനില ഗുരുതരമായി തുടരുകയാണ്​.

പ്രാഥമിക പരിശോധനയിൽ ഉപകരണത്തിൻറെ കംപ്രസർ പൊട്ടിത്തെറിച്ചതായാണ്​ കണ്ടെത്തിയത്​. കേസ്​ രജിസ്റ്റർ ചെയ്​ത പൊലീസ്​ ഓക്​സിജൻ കോൺസെൻട്രേറ്റർ വിതരണം ചെയ്​ത കടക്കാരനെ ചോദ്യം ചെയതു.