തിരുവനന്തപുരം വിഴിഞ്ഞത്തെ അർച്ചനയുടെ മരണത്തിൽ ഭർത്താവ് സുരേഷിനെ വീണ്ടും പൊലീസ് കസ്റ്റഡിയിലെടുത്തു. വിശദമായി ചോദ്യം ചെയ്യുമെന്ന് പൊലീസ് അറിയിച്ചു. അതേസമയം അർച്ചനയുടെ മൃതദേഹവുമായി നാട്ടുകാരും ബന്ധുക്കളും പ്രതിഷേധിച്ചു. സുരേഷിനെ അറസ്റ്റ് ചെയ്യുന്നത് വരെ പ്രതിഷേധം തുടരുമെന്ന് ബന്ധുക്കൾ വ്യക്തമാക്കി. കുറ്റമറ്റ രീതിയിലുള്ള അന്വേഷണം ഉറപ്പ് നൽകിയതിനാലാണ് നാട്ടുകാർ പിരിഞ്ഞുപോയത്.  മകൾ ആത്മഹത്യ ചെയ്യില്ലെന്നും സംഭവത്തിൽ കൃത്യമായ അന്വേഷണം വേണമെന്നും പെൺകുട്ടിയുടെ കുടുംബം ആവശ്യപ്പെട്ടിരുന്നു. സുരേഷ് സംഭവത്തിന് ശേഷം ഒളിവിലായിരുന്നു. പിന്നീട് ഇയാളെ പിടികൂടി വിട്ടയച്ചിരുന്നു. സ്ത്രീധന പ്രശ്‌നം അടക്കമുള്ള കാര്യങ്ങൾ ഉണ്ടെന്നും അർച്ചനയുടെ കുടുംബം ആരോപിച്ചിരുന്നു.തിരുവനന്തപുരം തഹസിൽദാർ, കോവളം എംഎൽഎ എം വിൻസന്റ് അടക്കം നാട്ടുകാരുമായി സംസാരിച്ചു. പ്രതിഷേധത്തിൻറെ ഭാഗമായി വിഴിഞ്ഞം- പള്ളിച്ചൽ റോഡ് നാട്ടുകാർ ഉപരോധിച്ചു. എഫ്‌ഐആറിലെ അസ്വാഭാവികതയും നാട്ടുകാർ ഉയർത്തിക്കാട്ടി.