സ്ത്രീകള്‍ക്ക് സ്വാതന്ത്ര്യവും നിര്‍ഭയവും സുരക്ഷിതവുമായ സഞ്ചാര സ്വാതന്ത്ര്യമുറപ്പാക്കല്‍, മദ്യത്തിനും മയക്കുമരുന്നിനുമെതിരായ നിതാന്ത ജാഗ്രതയുണര്‍ത്തല്‍, തുല്യ നീതി അവസര സമത്വം എന്നിവ എല്ലാ മേഖലകളിലും നടപ്പിലാക്കല്‍ തുടങ്ങിയ സന്ദേശങ്ങളുയർത്തി  അന്താരാഷ്ട്ര വനിതാ ദിനത്തിന് മുന്നോടിയായി സ്ത്രീകൾ ഇരുചക്രവാഹന റാലിയ്‌ക്കൊരുങ്ങുന്നു. സംസ്ഥാന വനിത ശിശു വികസന വകുപ്പിന്റെ നേതൃത്വത്തില്‍ വാരാചരണത്തിന്റെ മൂന്നാം ദിനമായ നാളെ  വൈകുന്നേരം 4.30  നാണ്  ഇരുചക്രവാഹന റാലി. 

തിരുവനന്തപുരം വെള്ളയമ്പലം മാനവീയം വീഥിയില്‍ നിന്നുമാണ് ഇരുചക്രവാഹന റാലി ആരംഭിയ്ക്കുക.നഗരത്തിന്റെ വിവിധ കേന്ദ്രങ്ങള്‍ സന്ദര്‍ശിച്ച് മാനവീയം വീഥിയിലെ നീര്‍മാതളച്ചുവട്ടില്‍ റാലി എത്തിച്ചേരും. തുടര്‍ന്ന് വിവിധ സാംസ്‌കാരിക പരിപാടികള്‍ നടക്കും.