ഇന്ന് ദേശീയ ബാലികാദിനമായിരുന്നു. പക്ഷേ മാധ്യമങ്ങളും ബുദ്ധിജീവികളും വർത്തമാനകാലത്തെ ബാലികാദിനത്തിന്റെ പ്രസക്തിയെക്കുറിച്ച് ഒന്നും പരാമർശിച്ചില്ല. വാളയാറിലെയും ഉത്തർപ്രദേശിലെയും പെൺകുട്ടികളുടെ ആത്മാക്കൾ നീതിക്കായി കേഴുമ്പോഴാണ് ബാലികാദിനം കടന്നുവന്നതെന്നത് ശ്രദ്ധേയം. സ്ത്രീ അമ്മയാണ്, ദേവിയാണ്, ഭാര്യയാണ്, സഹോദരിയാണ്, മകളാണ് എന്നൊക്കെ ഘോരഘോരം പറയുന്നവരാരും 
ബാലികാദിനത്തിന്റെ പ്രസക്തിയെക്കുറിച്ച് മിണ്ടിയിട്ടില്ല.
ഇന്ത്യയുടെ ആദ്യത്തെ വനിതാപ്രധാനമന്ത്രിയായി 1966-ൽ ഇന്ദിരാഗാന്ധി ചുമതലയേറ്റ ജനുവരി 24 ആണ് ദേശീയ ബാലികാ ദിനമായി ആചരിക്കുന്നത്. പെൺകുട്ടികളുടെ അവകാശങ്ങൾ സംരക്ഷിക്കുന്നതിനും അവർ നേരിടുന്ന ലിംഗ വിവേചനത്തിനെതിരെ ബോധവത്കരണം നടത്തുന്നതിന്റെയും ഭാഗമായാണ് ദേശീയ ബാലികാ ദിനമായി ജനുവരി 24 ആചരിക്കുന്നത്.