മലയാളികളുടെ ഭക്ഷണത്തിൽ പൂവുകൾക്ക് വലിയ സ്ഥാനമുണ്ടായിരുന്നു. കാലം മാറുന്തോറും ഭക്ഷണരീതിയും മാറി. ഫാസ്റ്റ്ഫുഡ് സംസ്കാരം കേരളീയരെ രോ​ഗികളാക്കിക്കൊണ്ടിരിക്കുന്ന സാഹചര്യത്തിൽ പൂവുകൾക്കുള്ള പ്രാധാന്യം വർ‌ദ്ധിക്കുകയാണ്.

മത്തൻപൂവ്

മത്തൻ‌പൂവിലടങ്ങിയിരിക്കുന്ന ബീറ്റാകരോട്ടിൻ കണ്ണിന്റെ ആരോ​ഗ്യത്തിന് നല്ലതാണ്. കാൽസ്യവും, വൈറ്റമിൻ സിയും ഇതിൽ ധാരാളമുണ്ട്. ​ഗർഭിണികൾക്കും മുലയൂട്ടുന്ന അമ്മമാർക്കും ഇത് നല്ലതാണ്.

വാഴക്കൂമ്പ്

നാരുകളും വൈറ്റമിൻ സിയും വാഴക്കൂമ്പിലുണ്ട്. ഇത് ​കൂടാതെ മ​ഗ്നീഷ്യവും പൊട്ടാസ്യവും ഉണ്ട്. പൊട്ടാസ്യം ബി.പി കുറയ്ക്കാൻ സഹായിക്കുന്നു. കൊളസ്ട്രോൾ കുറയ്ക്കാനും വാഴക്കൂമ്പ് നല്ലതാണ്.

മുരിങ്ങപ്പൂവ്

അയൺ,കാൽസ്യം എന്നിവ മുരിങ്ങപ്പൂവിൽ ധാരാളമായി അടങ്ങിയിരിക്കുന്നു.  ഇത് കൂടാതെ ധാരാളം ആന്റി ഓക്സിഡന്റുകളും ഉണ്ട്. രോ​ഗപ്രതിരോധശേഷി വർദ്ധിപ്പിക്കാനും മുലപ്പാൽ വർദ്ധിപ്പിക്കാനും മുരിങ്ങപ്പൂവ് നല്ലതാണ്. പ്രമേഹം, കൊളസ്ട്രോൾ എന്നിവ നിയന്ത്രിക്കാനും ഇതിന് കഴിവുണ്ട്.

ചെമ്പരത്തിപ്പൂവ്
-
ആന്റി ഓക്സിഡന്റുകളുടെ കലവറയാണ് ചെമ്പരത്തിപ്പൂവ്. ശരീരത്തിൽ ഫ്രീ റാഡിക്കലുകൾ ഉണ്ടാകുന്നത് തടയുവാനും ഹൃദയാരോ​ഗ്യം മെച്ചപ്പെടുത്താനും രക്തസമ്മർദ്ദം കുറയ്ക്കാനും ചെമ്പരത്തിപ്പൂവിന് കഴിവുണ്ട്. ചെമ്പരത്തിപൂവ് കൊണ്ട് ഹെർബൽ ടീ തയ്യാറാക്കി കുടിക്കാം.

അ​ഗസ്തിപ്പൂവ്

കാൽസ്യം, അയൺ, വിറ്റാമിൻ എ എന്നിവ അ​ഗസ്തിപ്പൂവിൽ ധാരാളമായി അടങ്ങിയിട്ടുണ്ട്. ക്ഷീണമകറ്റാനും വിളർച്ച മാറ്റാനും ഇത് നല്ലതാണ്.

കോളിഫ്ളവർ

നാരുകളും ജീവകങ്ങളും കോളിഫ്ളവറിൽ ധാരാളം അടങ്ങിയിട്ടുണ്ട്. ഇത് കൂടാതെ ആന്റി ഓക്സിഡൻ്റ്സും ധാരാളമുണ്ട്. കാൻസർ ഹൃ​ദ്രോ​ഗം എന്നിവ തടയാൻ ഇത് സഹായിക്കുന്നു.