ലോക്ക് ഡൗൺ നിയന്ത്രണങ്ങൾ കാറ്റിൽപ്പറത്തി നൂറിലധികം പേരെ വിളിച്ചുചേർത്ത് ഭാഗവത പാരായണം സംഘടിപ്പിച്ച കേസിൽ ബിജെപി നേതാവുൾപ്പടെ അഞ്ചുപേർ അറസ്റ്റിൽ. തൃശ്ശൂർ എരുമപ്പെട്ടിക്ക് സമീപം പാഴിയോട്ടുമുറി നരസിംഹമൂര്‍ത്തി ക്ഷേത്രത്തിലാണ് ലോക്ക് ഡൗൺ സമയത്ത് ഭാഗവത പാരായണം നടത്തിയത്. ആരാധനാലയങ്ങളിലും പ്രാർത്ഥനകേന്ദ്രങ്ങളിലും ആളുകൾ കൂടുന്ന സാഹചര്യം ഒഴിവാക്കണമെന്ന് സംസ്ഥാന, കേന്ദ്ര സർക്കാരുകളുടെ കർശനമായ നിർദേശം നിലവിലിരിക്കുമ്പോഴാണ് ക്ഷേത്രത്തിൽ സ്ത്രീകളും കുട്ടികളുമുൾപ്പടെ എത്തിയത്. രാവിലെ 7.30 ന് ആയിരുന്നു സംഭവം. സംഭവത്തില്‍ പൊലീസ് കേസെടുക്കുകയും അഞ്ച് പേരെ അറസ്റ്റ് ചെയ്യുകയും ചെയ്തു. ബിജെപി സംസ്ഥാന സമിതി അംഗം ഇ ചന്ദ്രന്‍ ഉള്‍പ്പെടെ അഞ്ച് പേരാണ് അറസ്റ്റിലായത്. സംഭവ സ്ഥലത്തെത്തിയ പൊലീസിനെ കണ്ട് പകുതിയിലേറെ ആളുകള്‍ ഓടി രക്ഷപ്പെട്ടു.