മർദനത്തെത്തുടർന്ന് മനംനൊന്ത് പെട്രോൾ ദേഹത്ത് ഒഴിച്ച് ആത്മഹത്യയ്ക്ക് ശ്രമിച്ച യുവാവ് മെഡിക്കൽകോളേജ് ആശുപത്രിയിൽ മരിച്ചു. എലത്തൂർ എസ്.കെ. ബസാറിലെ നാലൊന്നുകണ്ടി രാജേഷ് (42) ആണ് ശനിയാഴ്ച രാത്രി 11.30-ഓടെ മരിച്ചത്. ഈമാസം 15-ന് വൈകുന്നേരം അഞ്ചരയ്ക്ക് റോഡരികിലായിരുന്നു ആത്മഹത്യാശ്രമം. പൊള്ളലേറ്റ രാജേഷിനെ മെഡിക്കൽകോളേജ് ആശുപത്രിയിൽ പ്രവേശിപ്പിക്കുകയായിരുന്നു. കണ്ടാലറിയാവുന്ന പത്തോളം പേർ സംഘംചേർന്ന് ആക്രമിച്ചതിൽ മനംനൊന്താണ് ആത്മഹത്യയ്ക്ക് ശ്രമിച്ചതെന്ന് രാജേഷ് കോഴിക്കോട് അഞ്ചാംക്ലാസ് മജിസ്ട്രേറ്റ് കണ്ണന് മൊഴി നൽകിയിരുന്നു. കടുക്ക പറിക്കുന്ന തൊഴിലാളിയായ ഇദ്ദേഹം ഈ മേഖലയിൽ ജോലി ഇല്ലാതായതോടെ വായ്പയെടുത്ത് പുതിയ ഓട്ടോ വാങ്ങിയെങ്കിലും സ്റ്റാൻഡിൽനിന്ന് ഓടിക്കാൻ സി.ഐ. ടി.യു. യൂണിയൻകാർ അനുവദിച്ചില്ലെന്നും പലപ്പോഴായി തടഞ്ഞുനിർത്തി ആക്രമിച്ചെന്നുമാണ് മജിസ്ട്രേറ്റിന് നൽകിയ മൊഴി. സംഭവത്തിൽ രണ്ട് സി.പി.എം. പ്രവർത്തകരെ കഴിഞ്ഞദിവസം എലത്തൂർ പോലീസ് അറസ്റ്റ് ചെയ്തിരുന്നു. ഭാര്യ: രജിഷ. അച്ഛൻ: പരേതനായ അച്യുതൻ. അമ്മ: ഗൗരി. സഹോദരങ്ങൾ: വിനോദ് (ഫാറൂഖ്), വിജയൻ, സബിത, പവിത, പരേതരായ വിൻസൺ, വിപിൻ.