കുടുംബ വഴക്കിനെ തുടർന്ന് വീട്ടമ്മയെ വീട്ടിൽ പൂട്ടിയിട്ടതായി പരാതി . ഒടുവിൽ വീട്ടമ്മ രഹസ്യവിവരം കൈമാറിയതിന് പിന്നാലെ   പൊലീസും നാട്ടുകാരുമെത്തി മോചിപ്പിച്ചു  . ഇളങ്കാട് കൊടുങ്ങവയലിൽ ജെസിയാണ്​ (65) ഭർത്താവ് തന്നെ വീട്ടിൽ പൂട്ടിയിട്ട വിവരം പഞ്ചായത്ത് അംഗത്തെ അറിയിച്ചത്  . തുടർന്ന് പഞ്ചായത്ത്​ അംഗം സിന്ധു മുരളി, പഞ്ചായത്ത് പ്രസിഡൻറ്​ പി.എസ്. സജിമോൻ എന്നിവരുടെ നേതൃത്വത്തിൽ കലക്ടർ, പൊലീസ് എന്നിവരെ വിവരം അറിയിച്ചു.

തുടർന്ന് മുണ്ടക്കയം പൊലീസ് എത്തി ഇവരെ രക്ഷപ്പെടുത്തുകയായിരുന്നു. തക്കസമയത്ത് ഇടപെട്ടത് കൊണ്ട് ഇവർക്ക് ബുദ്ധിമുട്ടുകൾ ഒന്നും ഉണ്ടായില്ല .ജെസി നൽകിയ പരാതിയുടെ അടിസ്ഥാനത്തിൽ ഭർത്താവ് വർക്കി, മകൻ ജെറിൻ എന്നിവരെ ​പൊലീസ് അറസ്​റ്റ്​ ചെയ്തു. കുടുംബ വഴക്കാണ്  ഇത്തരമൊരു സാഹചര്യത്തിലേക്ക് നയിച്ചതെന്ന് പോലീസ് പറഞ്ഞു