തൃശൂർ മാപ്രാണത്ത് ലോട്ടറി വ്യാപാരി രാജനെ കുത്തിക്കൊന്നു. തിയേറ്ററിനു മുന്നിലെ പാർക്കിങ് തർക്കം കൊലപാതകത്തിൽ കലാശിക്കുകയായിരുന്നു. തിയേറ്റർ നടത്തിപ്പ്കാരനും ജീവനക്കാരുമാണ് രാജനെ ആക്രമിച്ചത്. മാപ്രാണം വർണ്ണ തിയേറ്ററിനു മുന്നിൽ ഇന്നലെ അർധരാത്രിയാണ് സംഭവം. തിയേറ്ററിൽ സിനിമ കാണാൻ എത്തുന്നവർ തൊട്ടടുത്ത വഴിയിൽ വാഹനങ്ങൾ പാർക്ക് ചെയ്യുന്നത് പ്രശ്നങ്ങൾ സൃഷ്ടിച്ചിരുന്നു. കൊല്ലപ്പെട്ട രാജന്റെ വീട് തിയേറ്ററിനു സമീപത്താണ്. രാജനും മരുമകൻ വിനുവും പാർക്കിങ്ങിനെ ചൊല്ലി പരാതി ഉന്നയിക്കുകയും തുടർന്ന് തർക്കം ഉണ്ടാകുകയും ചെയ്തു. ഇതിനു ശേഷമാണ് തിയേറ്റർ നടത്തിപ്പുകാരനും മൂന്നു ജീവനക്കാരും ചേർന്ന് രാജന്റെ വീട്ടിൽ കയറി അക്രമം നടത്തിയത്. 

മാരകായുധങ്ങളുമായി വീട്ടിൽ ഇരച്ചു കയറിയ സംഘം രാജനെയും മരുമകൻ വിനുവിനെയും ആക്രമിക്കുകയായിരുന്നു. ആക്രമണത്തിനിടെ കുത്തേറ്റ രാജൻ രകതം വാർന്ന് സംഭവ സ്ഥലത്ത് വെച്ച് തന്നെ മരിച്ചു. സംഭവത്തിന് ശേഷം തിയേറ്റർ ജീവനക്കാർ ഒളിവിലാണ്. ഇരിങ്ങാലക്കുട ഡി വൈ എസ് പി യുടെ നേതൃത്വത്തിൽ അന്വേഷണം പുരോഗമിക്കുകയാണ്.